Munisipale ereburgerskap vir Giliomee
Die Stellenbosch Munisipaliteit het vandag tydens ‘n spesiale seremonie munisipale ereburgerskap aan die wêreldbekende historikus en politieke skrywer, prof Hermann Giliomee, toegeken.
Die uitvoerende burgemeester, Jeremy Fasser, het die toekenning oorhandig en die ongelooflike bydraes van Giliomee tot die gemeenskap en Suid-Afrika as geheel beklemtoon.
“Prof. Giliomee is nie net ‘n trotse inwoner van wyk 22 nie, maar ook een van Stellenbosch se mees gerespekteerde burgers. Sy invloed strek baie verder as ons dorpsgrense en bereik klaskamers, biblioteke, nuuskantore en politieke kamers dwarsoor Suid-Afrika en internasionaal,” het die burgemeester gesê.
Giliomee, wat al meer as 50 jaar in Stellenbosch woon, word wyd beskou as een van die voorste historici van sy tyd. Sy werk word gekenmerk deur intellektuele deeglikheid, onwrikbare aandag aan detail en ‘n verbintenis tot gebalanseerde en regverdige analise.
“Sy geskrifte inspireer nie net akademici en politici nie, maar ook gewone burgers wat streef om ons land se geskiedenis beter te verstaan. Sy vermoë om ingewikkelde historiese en politieke narratiewe toeganklik te maak, is ‘n seldsame geskenk,” het Fasser bygevoeg.
Die toekenning is gemaak ingevolge die Stellenbosch Munisipale Eerbewysverordening van 2002, en erken Giliomee se uitstaande bydraes:
• Tot die letterkunde, vir die verryking van Suid-Afrikaanse geskiedskrywing en identiteit,
• Tot akademia, deur die vorming van generasies studente en akademici,
• Tot joernalistiek, deur sleutelkwessies met insig en integriteit te belig,
• Tot politieke diskoers, deur ingeligte debat te bevorder en
• Tot die gemeenskap, deur aktiewe deelname as ‘n burger van Stellenbosch.
Die burgemeester het ook erkenning gegee aan sy voorganger, adv. Gesie van Deventer, wat die proses om hierdie eerbewys aan Giliomee toe te ken, begin het.
“Prof. Giliomee se nalatenskap is verweef in die weefsel van Stellenbosch en die breër Suid-Afrikaanse verhaal. Ons is trots om hierdie eer aan so ‘n verdienstelike inwoner van Stellenbosch te oorhandig,” het Fasser afgesluit.
