Munisipale direkteur in die sop

‘Onwettige veranderinge‘ aan amptelike dokumente groot kopseer vir direkteur
Groot kommer heers onder Stellenbosse belastingbetalers oor ‘n klagte wat teen die direkteur van korporatiewe dienste tydens ‘n onlangse raadsvergadering gemaak is.
‘n Ingeligte bron in die munisipaliteit, wat weens vrees vir vervolging anoniem wil bly, het gesê die klagtes is teen Annalene de Beer, direkteur van korporatiewe dienste, gemaak weens wanbestuur en misbruik van gesag. Dit spruit uit voorvalle waartydens onregmatige veranderinge aan datums op amptelike dokumente en ook die aanpassing van die inhoud van ander dokumente, na bewering gemaak is. Die klagte is deur Alexander Kannemeyer, die menslike hulpbronbestuurder van die Stellenbosse munisipaliteit en Mynhard Slabbert, DA-wyksraadslid vir wyk 21, gemaak.
Tydens die spesiale raadsvergadering wat op Donderdag 23 Januarie gehou is, het 38 van die 42 raadslede ten gunste van ‘n ondersoek na die beweringe gestem. Die VF+, die ACDP en EFF het nie die mosie ondersteun nie. Volgens die bron is ‘n regsfirma, reeds genader om die voorval en bewerings te ondersoek.

De Beer is reeds geruime tyd in die kollig, hoofsaaklik weens die wyse waarop sy deur die vorige burgemeester, Gesie van Deventer, op ‘n langtermynkontrak aangestel is. Direkteurs van munisipaliteite van ‘n spesifieke gradering word gewoonlik op ‘n 5-jaar kontrak aangestel, maar De Beer se kontrak is onder groot kontroversie deur Van Deventer na 10 jaar verleng. Geraldine Mettler, die munisipale bestuurder, het na verneem word ook De Beer se aanstelling goedgekeur en onderteken. Hierdie aanstelling is na bewering egter nooit deur die raad goedgekeur nie en was die onderwerp van ‘n hofsaak om dit reg te stel. Van Deventer het volgens die bron ook agter die skerms gewerk om te probeer verseker dat die huidige klagte teen De Beer nie verlede week voor die raad moet dien nie.

Stuart Grobbelaar, munisipale woordvoerder, het op navrae gereageer en gesê: “Op hierdie stadium is ons nie in staat om enige besonderhede te verskaf nie, aangesien hierdie saak ’n interne HR-proses rakende ’n personeellid behels. Die proses word uitgevoer volgens behoorlike prosedures en arbeidswetgewing. Ons sal ’n opdatering verskaf sodra die ondersoek afgehandel is en aan die Raad voorgelê is.”

NUWE WENDING

Intussen het die munisipaliteit via hul woordvoerder, Stuart Grobbelaar, ‘n vraagteken oor die korrektheid van die inligting geplaas en verskoek om die volgende feite te publiseer:

“Ons neem kennis van die artikel wat op 31 Januarie 2025 gepubliseer is en wil graag sekere feite regstel vir die doel van akkurate en gebalanseerde verslaggewing.

“Daar is aan u foutiewe inligting verskaf rakende die stemverhoudings in die betrokke mosie. Die feite soos vervat in die artikel weerspieël nie akkuraat die inhoud van die klankopname en die amptelike notule nie. Dit is ’n belangrike korrektiewe punt, aangesien dit die werklike konteks van die besluit en die Raad se verbintenis tot ’n deursigtige ondersoek beïnvloed.

“Verder wil ons beklemtoon dat hierdie aangeleentheid in ’n in-komitee vergadering bespreek is. Dit bring mee dat raadslede aan konfidensialiteitsvereistes gebonde is. Gevolglik kan ons tans nie verdere besonderhede verskaf nie, aangesien dit ’n interne HR-proses betref wat streng volgens arbeidswetgewing en toepaslike prosedures hanteer word.”